Luk 17 | BEF | STEP | Yesu koko panana'a lu epi'ehina: Asaga'na fato fato ninauba huto hulenogo asaga boana'i foipanagu enele'mo malalina huto hu'ehina yabe. Ya hu'ehina enali'ani anana li huto hilata nehana bona'moya ke luto nolu epolobe.

Luke 17

Foipanamofihi hapa'a

Mt 18:6-7, 21-22; Mk 9:42

1 Yesu koko panana'a lu epi'ehina: Asaga'na fato fato ninauba huto hulenogo asaga boana'i foipanagu enele'mo malalina huto hu'ehina yabe. Ya hu'ehina enali'ani anana li huto hilata nehana bona'moya ke luto nolu epolobe. 2 Ma lagaso meso boana'magihi foipanagu enele'moto folo lalibe. Ya hu laligi sipi efahi mone lubaha'alo naga ilete hege nagamilugu lita fo bilenogo ai aku'i ana foipa foipana li huto mehilibe. 3 Lenali kaba hu bati lenalitinimu'i hilo. Kogonakauba foipana li huto nohinogomo kai ka emekibo. To komopa'a i gelehe nohinogomo kai foipana'a li he'mi etobo. 4 To sebeni'a yupahi moneko yegegu foipana huloto sebeni'a yupahi kaitoga oto ma luto lu kimilibe: Nani yatai komopa'ni i gelehe nohube, ya lulenogomo kai yalo foipana'a li he'mi etobo.

Kaga keheli ule'ale huse'i

5 Aposolo pana'magi Yesuhi ma lite lu emi'ahana: Kaga keheliloto ule'ale huse'nati le'mo sipi hu letobo. 6 Yesu ka'anilo ma luto lu epi'ehina: Lenali yafa legeya lagaso'asi mone'mofihi suhi luto kaga kehelise'natini ni'inogomo ya'mana nemuya yafa'a ma lite lu etalo: Kai ma yafamaka hapa'aka hiti i gonomi huloto buto hege nagamilugu kaika hekololoto tibo, lite linogo ana yafauba lenabaga liyafa huto kagatini kehelilina'mu yabe, luto Yesu lu epi'ehina yabe.

Lili'nalo bomofihi lili'na nolina hapa'a

7 Lili'nalo boka moneuba foyakagu ke'muya nokifilinatifi to holupa kifigu yagaka kaba nohilinagati noenogomo me'me huto oto nose'naka nobo, luto lulata nohata ni'ifihe? 8 O'e, ya lulata menohane. Nose'na'ni li loloba hu netoloto gilimika i hetofa nohuto nose'na'ni alifito ito oto nimitogo nani yata'a nolenogo'ni kaika alihi nose'naka nalane, luto lulata nohibe. 9 Lili'nalo bo'auba sipi bo'amofihi baga liyafa huto agoya hu emina'mu sipi bo'auba lili'nalo bo'amofihi bati huto hetofa suhi hane, luto gepohi lilata nohifi? 10 Ana suhi luto lenalitoga hiti ni'ibe. Ya hu'ehinagi asaga'na Hu'mau lu lepolo'ehilina suhi hi su heletemo lenali ma lite lilo: Lali lili'nalo bati mehuta bo yabe. Ana'ina nolutaya ai lali lili'nati ni'ibe.

Falame bona'i teni'a Yesu enele'mo bati hu'ehina

11 Yesu Yelusale hepatoga mege'i mololoto Samalia kapo'a hiti Galili kapo'a hiti folagaha'atitigu bu'ehina. 12 Ya huto hepa'i monelugu notigo falame bona'i nayahi luga luga su hago nehana Yesutoga e'ahana. Enali ete Yesuhi gufasilo ete ho metina foto'i ete ho tite mine'ahana yabe. 13 Ya hilete kehe sipi ma lite i'ahana: Yesuo. Sipi Boti. Kai kiginaga fi limibo. 14 Yesu bu enogoloto ma luto lu epi'ehina: Lenali binogo mono bona'magi belelete lenugufatini bi geno. Enali kapogu nebago falame'ani gololo ti su ho epolo'ehina yabe. 15 Ya higo moneko bouba falame'a bu gana gololo ti su nohago bu goloto ai i behe huto nooto sipi kehe ito Hu'mamofihi fokehi ho emito o'ehina yabe. 16 Ya huloto oto Yesuhi gigusagu golaga fito nokoto Yesuhi gepohi li'ehina yabe. Ya'mana bo ai Samalia kapolo bouba yabe. Yuta bona'magi ya'ma Samalia bona'mofihi enele'mo laba hilata nehana. 17 Ya nohigo Yesu kehe ito lu'ehina: Nayahi luga luga su hago bo enele'mo bati hu'ohube. Ya hu'ohuna naeni'a hiya'a nehabe? Enali henabe lite ete Hu'mamofihi fokehi menehabe? 18 Hena hibe luto fatoga bouba aisigo oto Hu'mamofihi gi'a li saga huto fokehi nohabe? 19 Yesu ma luto ana bo lu emi'ehina: Kai kaga keheli ule'ale nohatanauba kele'mo bati nohinagi kai ho tito bubo.

Hu'mamofihi Kapo'a alina'mu yabe

Mt 24:23-28, 37-41

20 Felosi bona'i luga'amagi Hu'mamofihi Kapo'a hiya yupahi huto hilina ni'ibe, lite Yesuhi loka he'ahana. Ya lago Yesu ka'anilo ma luto lu epi'ehina: Hu'mamofihi Kapo'a alina yupahi boana'magi enubu'anitu'i be megalana'mu yabe. 21 Bo moneuba Hu'mamofihi Kapo'a ma nina bu galo lula muya nina bu galo lula mehilina'mu yabe. Hena'mugope Hu'mamofihi Kapo'a lenali folagahatinigu hiti ni'ina'mu yabe.

22 Yalo koko pana'a ma luto lu epi'ehina: Alihi kana mone huto hilina yupahi lenali lenipagu yibi hilete ma lite lilabe: Kokulumaguti limi'ehina Bomofihi kana'a mele'isi aku huto hulenogo bu galune. Ya lilana lenali bu megalana'mu yabe. 23 To bona'i mone'a ana lite minalanamagi muyana bu gobo lila to mana bu gobo lila hilana'mu yabe. Ya lilenogo lenali heleko limite bite anana sa sa mehilana'mu yabe. 24 Kopisi'nauba i begena huloto kokulumatoga mone kegi'a buto i begena hula oto mone kegi'a i begena hula nohinana yago Kokulumaguti limi'ehina Bouba yatai ya'ma kana'alo ana suhi hilina'mu yabe. 25 Ya hu'ehina ai yata'a sipi gabu foya kofila to enali yatai bona'i ma nehanamagi okabagu bu go bati mehise megesa hu emila hilenogo yabe, luto Yesu lu epi'ehina yabe. 26 Koyapa'i Noaha kanalo huto hu'ehina suhi lito ana huto Kokulumaguti limi'ehina Bomofihi kana'alo huto hilina'mu yabe. 27 Asaga bona'i minete nose'na neba neba nehite ana'i kata hite nehago Noau sipi botigu tilago nagami'i bilito asaga boana'i enoho fito su ho'ehina suhi hilina'mu yabe. 28 Koyapa'a Lotiu minana kanalo enali nose'na nelete nagami'i nelete fato fato'na mina filete foya hekelete to nohi gila hite mine'ahana yabe. 29 Ana yupahi Lotiu Sotomu hepa'i he'mito nobigo kokulumaluguti sipi logo loto ekesa efahi go'i ito limiloto asaga boana'i enoho su ho'ehina yabe. 30 Kokulumaguti limi'ehina Bo aku alina yupahi yana suhi luto hepa'i kugumato huto'i huto hilina'mu yabe.

31 Ya hilina yupahi bo moneuba nohupita'alo nohilina aku'i noha'aluga limito fe'noha'a lilube'mu mehilina'mu yabe. Hena'mugope hololu luto bufa hilina'mu. Ana huto bo moneuba foya'agu minalina hepa'aga mebilina'mu yabe. 32 Lotihi liha'amoga lenekesa yigilo. Ai kapogu i behe huto fulu huto minoto ana'asi fili'ehinana'mu beto hilo. 33 Bo moneuba nugufa'ni sibina hiligi luto kaba huto le'mo bati bati hilina gufa'a he'milina'mu yabe. To bo moneuba nani lili'na nolito gufa'a kaba hu bati mehuse he'mi hale hilina alihi gufa'a huto hilina'mu yabe. 34 Nani lu nolepube. Ya'ma kanalo mone sininugu bona'i loemo moneka sipalo ke'ehila'inaloti mone le'mo bufa nohinogo mone'isi ana sipalo koloto minalina'mu yabe. 35 A'i loemale'i nose'na laita hite nehila'inaloti mone a'i ai le'mo saga nohinogo moneko a'i melugu minalibe. 36 To ana huto bo loemomale'i foyagu lili'na lite nehila'ina mone bo ai le'mo saga nohinogo moneko bo ana foyagu minalina'mu yabe. 37 Yesu ya luto lu epigo enali ma lite loka he'ahana: Sipi Bo, ya'ma nolata kaba hiya'alo huto hilina ni'ibe? To Yesu lu epi'ehina: Yaga fili'ehina hepa'i nina analo lupahi ete li nupa hite he loli'ali hite bego bego hite neminana yabe, luto Yesu lu epi'ehina yabe.